ჩცდ, ქეთი, ზაზა და განზოგადება

ძალიან მარტივად დავიწყებ. ქეთისა და ზაზას პრობლემა ჩვენი ცხოვრების უმნიშვნელოვანესი პრობლემაა, რადგანაც ეხება ნიაკოს, ანუ მომავალს. რა, ქმრისაგან უყურადღებოდ დატოვებულ ახალგაზრდა ნაირას, როგორც მისი თაობის უმრავლესობას, არ უღალატია საკუთარი მოღალატე ქმრისათვის თავის ექიმთან, მოძღვართან ან/და ძველ შეყვარებულთან ცხადში თუ არა, სიზმარში ან ოცნებებში მაინც?! სიზმარში და ოცნებებში ღალატს ქალბატონი ნაირა ალბათ ღალატს არ ეძახის, პირადად ჩემთვის ამ ორ ღალატს შორის დიდი განსხვავება არაა. ყველანაირი ღალატი დასაგმობია!!!

ქეთი ... ვგმობ ამ პერსონაჟს როგორც მოღალატეს, მიუხედავად იმისა, რომ მსხვერპლად მიმაჩნია. ასევე დასაგმობია, ცხოვრობდე ტყუილში, ანუ, ცხოვრობდე ადამიანთან, რომელიც არ გიყვარს და პატივს არ სცემ, და რომელსაც არ უყვარხარ და პატივს არ გცემს. თუ ქალს ასეთ სიტუაციაში არ უნდა იცხოვროს, მხოლოდ ერთი გამოსავალია - კარგი განათლება, საკუთარი საქმე, ბრძოლის უნარიანობა, რაც  დამოუკიდებლად არსებობის საშუალებას მისცემს. მინდოდა მიმეწერა ამ ქვეყნიდან გაქცევა-თქო, მაგრამ ვინ დარჩება მაშინ და არც სხვაგანაა ადვილი თავის დამკვიდრება. თუ ქეთი ამას შეძლებს, შეძლებს დამოუკიდებლად არსებობას, რასაც არაა შეჩვეული, მაშინ გადარჩება, კიდევ შეძლებს შექმნას სიყვარულზე და პატივისცემაზე აგებული ოჯახი, თუ არადა მოკვდება, აუცილებელი არაა ფიზიკურად (ესეც შესაძლებელია), მაგრამ უფრო ალბათურია სულიერი სიკვდილი, თუ ზაზას შეურიგდება და თავის თვას აპატიებს საკუთარ ღალატს. ამას მხოლოდ ქეთიზე არ ვამბობ, ამას ყველა გოგონას ვეუბნები: „ან თქვენი პროფესიონალიზმით, დამკვიდრების სურვილით და ბრძოლის ჟინით იქნებით პიროვნებები, თუ არა და დაკმაყოფილდით მონობით, როგორი კმაყოფილებიც  არიან თავად ქალბატონი ნაირაა, ან თუნდაც ქეთის ვითომ დაქალები, პირველ რიგში კატო, თავად ნინა და სხვები, თინას გარდა. ცხოვრებაშიც ბევრი გინახავთ ასეთები, თუნდაც უახლოეს გარემოცვაშიც.“

ზაზა ... ზაზაც მსხვერპლია. რა თქმა უნდა, ზაზა გაიგებს ქეთის ღალატს, ეს საქართველოა. იმის ალბათობა არის, რომ ცოლი მოკლას, მაგრამ ძალიან მცირე. უფრო მგონია, რომ აპატიებს, რადგანაც ზაზასავით გინებებით მოლაპარაკე ვითომ ვაჟკაცები, ქალის სიყვარულსა და პატივისცემას ლაჩრობად რომ თვლიან, ბევრად უფრო სუსტები არიან, ვიდრე ჩუმი წესიერი კაცები, ალკოჰოლსა და თუნდაც სიგარეტს რომ არ ეტანებიან, სპორტით დაკავებულები, მანდილოსნების პატივისმცემლები, ასე ცოტა რომ გვყავს, მაგრამ გვყავს. ლოთობა - გაქცევაა, რეალობისაგან გაქცევა, გაქცევა კი სისუსტის ნიშანი, იმის ნიშანია, რომ უბედურად გრძნობს ადამიანი თავს. ზაზასაც ვურჩევდი, დაანებოს სასმმელსა და მსგავსებს თავი, აირჩიოს სპორტის რომელიმე სახეობა, გაიჩინოს რაიმე საყვარელი საქმე, მომავალში შეხვდეს ისეთ ახალგაზრდა ქალს, რომელსაც შეიყვარებს, პატივს სცემს და ენდობა. მოკლავს თუ შეურიგდება ქეთის, ორივე შემთხვევაში თავადაც სულიერად განადგურდება.

ნიაკო ... უბედური მშობლები ბედნიერ შვილს ვერ გაზრდიან. ნიაკოსათვის მთავარია, რომ მშობლები ყავდეს ბედნიერები.
მიაქციეთ ალბათ ყურადღება, აჩიკო განხილვის ღირსადაც რომ არ ჩავთვალე. 
ჩცდ ... ამ ესეს მთავარი გმირი, თითქმის მთელი საქართველო უყურებს. მაყურებლებიდან ზოგი მალავს, არ უყურებს კი არა, მალავს რომ უყურებს ორი მიზეზის გამო: 1) ერთგული ქოცი ვარ და ნაცების ტელევიზიას არასოდეს ვუყურებო - დამიჯერეთ, ის უფრო უყურებს, არა მხოლოდ ჩცდ-ს, არამედ ზოგადად რუსთავი 2-ს, ჩუმად, სხვა რომ ვერ ხედავს, ზოგჯერ ოჯახის წევრებსაც კი უმალავს, რადგანაც ფბ-ზეც ჩანს, რომ ყოველთვის იცის, რას გადმოსცემს ეს ტელევიზია; 2) უნდა აჩვენოს, რომ ინტელექტუალია და ბევრად მაღლა დგას ეგრეთ წოდებულ ‘საპნის შოუებზე’. არადა, უყურებს, სხვა რა საქმე აქვს, რადგანაც ეს ძირითადად ის ხალხია, ვინც თავისი ინტელექტის გამოყენება ვერ შეძლო, თორემ, ვინც მთელი კვირა მუშაობს და იღლება, პარასკევი საღამო და უიკენდი ისვენებს და ამ დასვენების ერთერთი ნაწილია ამ შოუს ყურება. პირადად მე ვუყურებ და მეც ორი მიზეზის მაქვს: 1) დაძაბული სამუშაო განრიგი არ მაძლევს იმის საშუალებას, რომ სოციალურად აქტიური ვიყო; დასვენება სახლში მირჩევნია და ჩცდ-ს სოციუმიც მეხმარება ამაში; 2) საკმაოდ ნიჭიერულადაა გადმოცემული ჩემი ქალაქის ცხოვრება, საკმაოდ ძლიერი სცენარისტი ყავს და დასმაც ამდენი წლის მანძილზე ძალიან გაითავისა როლები და ბუნებრივები არიან. მე პირადად, ცოტა ჭკუასუსტად მეჩვენება ის ვითომ ინტელექტუალი, ვინც ვერ აცნობიერებს, რა დიდი ძალაა, როდესაც ამდენი ხალხის მიზიდვა ხდება შესაძლებელი. მასებზე ზემოქმედება (რელიგია, მასმედია, ხელოვნება და ა.შ.) ყოველთვის იყო, არი და იქნება იარაღი ჭკვიანი ხალხის ხელში და ეს მხოლოდ ადამიანთა მცირე რაოდენობას შეუძლია. აქვე გაკვრით დავძენ, რომ ელიტაზე ზემოქმედება იმდენად მნიშვნელოვანი არაა, როგორც მასებზე, ამიტომ ამისათვის მაინცდამაინც არავინ ‘ჩალიჩობს’, მით უფრო დემოკრატიის პირობებში. 
მგონი ყველაფერი ვთქვი, რისი თქმაც მინდოდა და მაინც ...

ერთის დამრჩა: ჩემ გარშემო მყოფ ხალხს გადავავლე თვალი (თვალის გადავლება ადამიანმა საკუთარი თავიდან უნდა დაიწყო): უმრავლესობა გაურბის რეალობას - ზოგი ეკლესიას და მოძღვარს ეკედლება, ზოგი პროფესიაში იძირება, ზოგი სულ ხეხავს და რეცხავს, ამას არა უშავს, ბევრად უფრო ცუდიც ხდება, განსაკუთრებით ახალგაზრდებში სქესის მიუხედავად, სვამენ, კაიფობენ და აღარ მინდა მეტის ჩამოთვლა, რამაც ამ დასკვნამდე მიმიყვანა: სავარაუდოდ, შერიგდებიან ქეთი და ზაზა და გააგრძელებენ თავიანთ ჩხუბებით სავსე, გულგრილ/ინდიფერენტულ და უინტერესო ცხოვრებას.
პ.ს. ეს ესე რომ დავდე ფბ-ზე ერთმა ჭკვიანმა მეგობარმა მომწერა:   საქართველოში მოღალატე ცოლს, მითუმეტეს, თუ მისი ღალატის შესახებ შენამდე მთელმა საქართველომ გაიგო, არ ურიგდებიან ქმრები, არ მოსულა😊 .ვნახოთ, რას იზამს დევდარიანი, დაამსხვრევს თუ არა ამ სტერეოტიპსაც და ნიაკოს ოჯახს შეუნარჩუნებს. ჩემი აზრით, ვერ გაბედავს😊

რაზეც მე ვუპასუხე: ზაზასნაირი, ვითომ ვაჟკაცი (ვაჟკაცს აბა რაში ჭირდება ღრიალი, გინება, უპატივცემოლობა), პატიობს და ურიგდება, მაგალითებიც ვიცი რეალური ცხოვრებიდან, და ცოლიც ბრუნდება. სტერეოტიპის დამსხვრევა ის იქნება, თუ ქეთი თავად არ შეურიგდება და არ დაბრუნდება იმ დიდი დანაშაულის (ტყუილი) გამო, რაც მან ოჯახის წინაშე ჩაიდინა, და შეძლებს დამოუკიდებელი ცხოვრების აწყობას. მაგრამ გაქაჩავს კი?! ვეჭვობ ...

... დაველოდოთ და ვნახავთ.

გიმაიო

14/01/2019

თბილისი