ღმერთისა და ჩემი ათი მცნება

ყველაზე რთული დაწყებაა. საიდან დავიწყო? მოდით იმ მომენტიდან დავიწყებ, როდესაც მოსემ ის ფილები, „ღვთის ნაკეთები“ ფილები, რომელზეც ათი მცნება ეწერა, მიწას რომ დაანარცხა, რათა დაემსხვრია.

რატომ?!

ამ კითხვაზე პასუხი თავად მოსემ იცოდა ალბათ. სხვისთვის მაშინაც და განსაკუთრებით კი ამდენი საუკუნის შემდეგ ამ შეკითხვაზე პასუხის გაცემა ან შეუძლებული იქნებოდა/არი ან უამრავი სუბიექტური პასუხი არსებობდა/არსებობს. უპასუხოდ დატოვებული შეკითხვები მოსვენებას არ მაძლევენ, ამიტომ შევეცდები სუბიექტურად გავცე პასუხი.

ამისათვის იმასაც გავიხსენებ, რომ ფილების დამსხვრევამდე მოსე 40 დღე სინას მთაზე იმყოფებოდა, ხოლო იქ ავიდა, რათა ღმერთს მისთვის ორ ფილაზე დაწერილი ათი მცნება გადაეცა. ფილების გადაცემას 40 დღე არ ჭირდება. ალბათ ეს დრო საჭირო იყო, რათა ათი მცნება ჩამოყალიბებულიყო და ფილებზე ამოტვიფრულიყო. ალბათ ამ მთაზე მოსე მარტო არ იყო, იყო, ვთქვათ ღმერთთან ერთად, ან ვინმე უცხოპლანეტელთან, ვინც სიცოცხლე ჩამოიტანა დედამიწაზე და იმ პერიოდისათვის ჯერ კიდევ აკონტროლებდა, ან ... უამრავი სხვადასხვა ვერსიის წამოყენება შეიძლება ... მაგრამ ერთი ფაქტია, რომ ამ ცნებებს ჭკვიანი და მაქსიმალურად სრულყოფილი არსებები ქმნიდნენ. მოსეც ალბათ გონებრივი შესაძლებლობებით იმ ხალხზე ბევრად მაღლა იდგა, ვინც მას დაბლა ელოდებოდა.

ამიტომ გასაკვირი არაა, რომ ბარში მომლოდინე ხალხს 40 დღე დიდ დროდ მოეჩვენათ და მოუთმენლობისაგან ოქროს კერპი ჩამოასხეს, რომელსაც ხბოს ფორმა მისცეს. ჩამოსული და ამ კერპის (და არა მხოლოდ) დამნახავი მოსე მიხვდა, რომ იმ დიდ სიბრძნესა და სიყვარულს, რაც მის ხელთ მყოფ ფილებზე ეწერა, ის ხალხი, ვინც მას დაბლობში დახვდა ვერ გაიგებდა, მათ სულ სხვა რამე ჭირდებოდათ და ის ფილები უმცირეს ნაწილაკებად დაამსხვრია. კითხვა, რომელიც სუბიექტურადაც კი ბოლომდე პასუხგაუცემელი მრჩება არი შემდეგი: „ჩვენ, დღევანდელ განვითარებაზე მყოფი ადამიანები, ჩვენ თუ გავიგებდით და მივიღებდით იმას, რაც იმ დამსხვრეულ ფილებზე ეწერა?“.

ამის შემდეგ მოსე ისევ ავიდა სინას მთაზე და ისევ 40 დღე დაჰყო, რათა ფილების ასლები ჩამოეტანა. ასლი დედანს უნდა გავდეს, მაგრამ ასლი დედანი არაა, ამიტომ არაა სანდო მტკიცებულება თუნდაც სასამართლო განხილვებში. ასლი სანდო მაშინ ხდება, როდესაც ვთქვათ ნოტარიულადაა დამოწმებული, ამისათვის კი უფლებამოსილმა პირმა დედანს უნდა შეადაროს და თუ დედანი აღარ არსებობს, ასლი ყველანაირ ნდობას კარგავს. 

ამიტომ სუბიექტურად ვთვლი, რომ მოსეს მიერ ჩამოტანილი ასლი განსხვავებული იყო დედანისაგან, მაგრამ მსგავსებებსაც არ გამოვრიცხავ.

 არც ერთი ღმერთი, არც ერთი სულიერად ძლიერი პიროვნება/არსება არ მოითხოვს, რომ

·         მცნება პირველი: მე ვარ უფალი ღმერთი შენი, და არა იყვნენ შენდა ღმერთნი უცხონი, ჩემსა გარეშე.

·         მცნება მეორე: არა ჰქმნე თავისა შენისა კერპნი, არცა ყოვლადვე მსგავსნი, რაოდენი არს ცათა შინა ზე, და რაოდენი არს ქუეყანასა ზედა ქუე, და რაოდენი არს წყალთა შინა ქუეშე ქუეყანისა: არა თაყუანი-სცე მათ, არცა მსახურებდე მათ.

·         მცნება მესამე: არა მოიღო სახელი უფლისა ღმრთისა შენისაჲ ამაოსა ზედა.

• მცნება მეოთხე: მოიჴსენე დღჱ იგი შაბათი და წმიდა-ჰყავ იგი: ექვს დღე იქმოდე, და ჰქმნე მათ შინა ყოველივე საქმჱ შენი, ხოლო დღჱ იგი მეშჳიდჱ, შაბათი არს უფლისა ღმრთისა შენისაჲ.

ეს ღმერთის დაყენებულ მოთხოვნებს არ გავს. ამ მოთხოვნებს მხოლოდ ის დააყენებს, ვინც პირველ რიგში საკუთარ თავში არაა დარწმუნებული, უამრავი კომპლექსი თუ მანია აქვს, მათ შორის განდიდებისაც, არის სხვისგან უპირობო მორჩილების მოყვარული (ღმერთი ან ნებისმიერი სრულყოფილებასთან მიახლოვებული არსება ასეთი ვერ იქნება) და ამასთან აქვს ხალხზე საშინლად დაბალი წარმოდგენა, მაგრამ გონება უჭრის. ჩემი აზრით მოსეს სხვა ზემოთ ჩამოთვლილ თვისებებთან ერთად გონება საკმაოდ კარგად უჭრიდა და ხალხზეც რეალური, ანუ საკმაოდ დაბალი, წარმოდგენა ქონდა, ამიტომ შემორჩა მისი სახელი ისტორიას/ხალხს ამდენი საუკუნე.

არ ვიცი, დედანში იყო თუ არა, მაგრამ ამას დიდი მნიშვნელობა არ აქვს, რადგანაც შემდეგი 6 მცნება აუცილებლად უნდა შეასრულოს ნებისმიერმა ადამიანმა, თუნდაც იმიტომ რომ ადამიანად იგრძნოს თავი:

·         მცნება მეხუთე: პატივ-ეც მამასა შენსა და დედასა შენსა, რაჲთა კეთილი გეყოს შენ და დღეგრძელ იყვნე ქუეყანასა ზედა. - ეს მცნება მიყვარს განსაკუთრებულად, რამეთუ ადამიანი, რომელიც ამ მცნებას არ მისდევს, ყველა სხვა მცნების დამრღვევიცაა.

·         მცნება მეექვსე: არა კაც-ჰკლა.

·         მცნება მეშვიდე: არა იმრუშო.

·         მცნება მერვე: არა იპარო.

·         მცნება მეცხრე: არა ცილი-სწამო მოყუასსა შენსა წამებითა ცრუჲთა.

·         მცნება მეათე: არა გული გითქუმიდეს ცოლისათჳის მოყუასისა შენისა, არა გული გითქუმიდეს სახლისათჳის მოყუასისა შენისა, არცა ყანისა მისისა, არცა კარაულისა მისისა, არცა ყოვლისა საცხოვარისა მისისა, არცა ყოვლისა მისთჳის, რაჲცა იყოს მოყუასისა შენისა.

ნუ რადგანაც მაინც 10 მცნებაა მიღებული და მე მხოლოდ ექვსი შემომრჩა ხელთ, ოთხიც უნდა დავამატო, არა იმიტომ რომ ღმერთი ან მოსე მგონია თავი :D , არამედ იმიტომ, რომ ნებისმიერმა უბრალო მოკვდავმა თავის თავს უნდა წაუყენოს მოთხოვნები და ამ მოთხოვნების შესრულება მთელი ცხოვრება უნდა იტვირთოს:

·         მცნება პირველი: ღმერთი ან/და მისი იმიჯი ადამიანი სინამდვილეში უკიდეგანო სიყვარულია და, თუ გინდა, რომ ადამიანად დაბადებული მთელი ცხოვრება ადამიანი იყო და ადამიანადვე გარდაიცვალო, მაშინ მთელი ცხოვრების მანძილზე ზარდე შენ გულში ეს სიყვარული; იგი ბევრ კარგ საქმეს გაგაკეთებინებს. ერიდე სიძულვილს! შური და სიძულვილი ყოველგვარი სიბოროტის სათავეა.

·         მცნება მეორე: იშრომე ბევრი, ეცადე რამე ახალი შექმნა, რათა შენი თუნდაც უმნიშვნელო წვლილი შეიტანო კაცობრიობის წინსვლაში.

·         მცნება მესამე: განათლდი, ანუ მუდმივად გაკეთილშობილდი და ბევრი იკითხე, ისწავლე ის, რაც შენამდე შეუქმნიათ.

·         მცნება მეოთხე: ბოლომდე მხარში დაუდექი მომავალ თაობას, მაშინაც როდესაც წინ მიდის, რომ არ წაიბორძიკოს, და მაშინაც, წაქცეული რომაა, თუნდაც ტალახში ეგდოს ამოსვრილი. ოღონდ ამ დახმარებას სწავლა უნდა და ჯერ შენ ისწავლე, როგორ დაეხმარო, რომ დახმარებისას შეცდომები არ დაუშვა. ეს ყველზე მძიმე შეცდომებია, რადგანაც შენს მომავალს ეხება. - ეს მცნება ერთერთი ყველაზე მნიშვნელოვანია ჩემთვის.

მოკლედ, ათივე მცნება სახეზეა. თავს არ გახვევთ, რადგანაც მოსესავით ძლევამოსილი და ჭკვიანი არ ვარ, და ნამდვილად არ მაქვს არც იმის პრეტენზია და არც იმის მოლოდინი, რომ ვინმეს დავმოძღვრავ. მაგრამ თუ ამ პატარა ესეს წაკითხვის შემდეგ ერთი ადამიანი მაინც თავის პრიორიტეტულ მცნებას, ისეთს რომელიც წინსვლას შეუწყობს ხელს,  ჩამოაყალიბებს და შეეცდება მას მისდიოს, უბედნიერესი ვიქნები.

და მაინც, რა ეწერა იმ დამსხვრეულ  ფილებზე?!

გიმაიო
09/11/2018
თბილისი